Hvernig kenni ég hundinum að koma þegar kallað er

Fátt gefur meira frelsi en hundur sem kemur þegar kallað er. En áreiðanlegt innkall er ekki sjálfgefið, það er hegðun sem þú byggir upp, skref fyrir skref. Þegar hundurinn lærir að rödd þín þýðir alltaf eitthvað gott, kemur hann hlaupandi af fúsum vilja.

Innkall er þjálfað, ekki sjálfgefið

Innkall er merki sem hundurinn hefur lært að tengja við umbun. Það styrkist með verðlaunum og veikist ef það er vanrækt eða ef hundurinn er skammaður. Hundur sem kemur ekki er ekki að ögra þér. Hundar gera einfaldlega það sem borgar sig, og ef umhverfið borgar betur en þú, þá vinnur umhverfið. Oftast hefur hundurinn annaðhvort ekki lært innkallið nógu vel við þessar aðstæður, eða eitthvað í umhverfinu er einfaldlega meira spennandi en það sem þú býður. Besta rannsóknin á innkalli sýndi að hundar sem þjálfaðir voru með áherslu á jákvæða styrkingu komu fljótar og áreiðanlegar en hundar sem þjálfaðir voru með rafmagnsól, og rafmagnsólin hafði velferðarkostnað án nokkurs ávinnings (China og félagar, 2020).

Uppskriftin sem virkar

Gott innkall byggir á nokkrum atriðum. Notaðu bestu verðlaunin, því gæði skipta meira máli en magn, lítill biti af einhverju frábæru virkar betur en stór skammtur af leiðinlegu nammi (Riemer og félagar, 2018). Verðlaunaðu strax, því sekúndu töf getur helmingað hversu hratt hundurinn lærir (Browne og félagar, 2011). Notaðu gott þjálfunarnammi og hafðu það til taks. Og eitt sem margir gleyma: leyfðu hundinum að fara aftur að því sem hann var að gera. Kallaðu hann til þín, verðlaunaðu, og slepptu honum svo aftur að þefa eða leika. Þannig þýðir innkall aldrei að fjörið sé búið.

Passaðu upp á innkallið

Flest innköll klikka af sömu ástæðum. Í fyrsta lagi: ekki kalla hundinn til að gera eitthvað sem honum mislíkar, eins og að fara í bað eða láta klippa klær, því þá lærir hann að innkallið spáir stundum fyrir um eitthvað leiðinlegt. Sæktu hann frekar í slíkum tilfellum. Í öðru lagi: aldrei refsa hundi sem kom til baka, sama hversu lengi hann var, því þá ertu að refsa því að koma til þín. Í þriðja lagi: ekki þylja orðið upp aftur og aftur án afleiðinga, því þá verður það að bakgrunnshljóði sem hundurinn lærir að hunsa. Ef innkallið er orðið gjörónýtt er oft auðveldara að kenna nýtt orð en að bjarga því gamla.

Æfðu á mörgum stöðum

Hundar yfirfæra ekki sjálfkrafa það sem þeir læra á einum stað yfir á annan. Hundur sem kemur fullkomlega í eldhúsinu veit það kannski alls ekki í garðinum fyrr en hann hefur verið þjálfaður þar líka (Gazit og félagar, 2005). Þess vegna þarf að æfa innkall á mörgum stöðum, með vaxandi truflunum, áður en þú treystir innkallinu í lausagöngu. Langur æfingataumur er brúin: hann leyfir hundinum að æfa sig og ná árangri undir auknum truflunum án þess að æfa það að hlaupa í burtu. Búðu þig líka undir að innkallið versni tímabundið á unglingsaldrinum, í kringum átta til tólf mánaða, það er eðlilegt og gengur yfir (Asher og félagar, 2020).

Mundu að lokum að innkall er líkindi, ekki trygging, sama hversu vel það er þjálfað. Þess vegna lætur góð stjórnun, langur taumur og rétt umhverfi, hundinn æfa sig örugglega á meðan þjálfunin er að festast. Viltu byggja upp traust innkall frá grunni? Grunnnámskeiðið okkar kennir þér einmitt þetta. Innkallið er líka einn af hornsteinunum í hundaþjálfuninni okkar.

Heimildir

1. China o.fl. (2020), Frontiers in Veterinary Science: jákvæð styrking borin saman við rafmagnsól í innkalli
2. Riemer o.fl. (2018), Applied Animal Behaviour Science: gæði umbunar skipta meira máli en magn
3. Browne o.fl. (2011), Journal of Veterinary Behavior: tímasetning umbunar í hundaþjálfun
4. Gazit o.fl. (2005), Animal Cognition: nám hunda er háð samhengi og stað
5. Asher o.fl. (2020), Biology Letters: minni svörun við eiganda á unglingsaldri